Paslit tumalon sa pool, nalunod

Todas ang 6-anyos na batang babae matapos malunod nang tumalon sa swimming pool sa isang resort sa Rodriguez, Rizal nitong Linggo ng tanghali.

Sa ulat ng Rodriguez Municipal Police Station (MPS), alas-12:30 ng tanghali nang matagpuang patay ang biktimang si alyas “Cyan,” Grade 1 student, nakatira sa Brgy. Burgos, Rodriguez, sa pool ng resort sa Brgy. San Rafael, Rodriguez.

Sinabi sa pulisya ng pamilya ng biktima abala sila sa paghahanda ng pagkain nang mapansin nilang nawawala ang bata.

Agad nilang hinanap ang biktima sa paligid ng resort pero hindi nila ito makita, maging sa kanilang inupahang cottage.

Dahil dito, agad silang humingi ng tulong sa mga nangangasiwa sa resort hanggang matagpuan ang biktimang nakalutang sa swimming pool.

Isinugod pa ang biktima sa ospital subalit idineklara na itong dead on arrival. (Dolly Cabreza)

The post Paslit tumalon sa pool, nalunod first appeared on Tonite - Abante.