Full disclosure sa nag-leak na Blue Ribbon report, hinirit

Naghain si Atty. Eldrige Marvin B. Aceron ng Petition for Full Disclosure ng draft report ng Senate Blue Ribbon Committee hinggil sa imbestigasyon sa mga flood control projects, alinsunod sa karapatan ng publiko sa impormasyon sa ilalim ng Saligang Batas.

Ang petisyon ay kasunod ng paglabas ng ilang detalye mula sa na-leak na draft report noong Pebrero 3, 2026, na naglalaman ng rekomendasyon na sampahan ng kaso ang ilang nakaupong at dating senador at iba pang opisyal ng gobyerno.

Noong Pebrero 4, 2026, binawi nina Senador Juan Miguel Zubiri, Joseph Victor Ejercito, at Win Gatchalian ang kanilang mga lagda sa draft report, na naging dahilan para hilingin ng petisyon na magsumite sila ng paliwanag sa pagbawi ng kanilang mga lagda. Kabilang sa iba pang hinihiling ng petisyon ang paglalabas ng buo at unredacted na draft, pagpapanatili ng lahat ng bersyon ng dokumento, at pagbibigay ng certified true copy sa Ethics Committee para sa mga nakabinbing reklamo laban kina Senador Escudero at Senador Ejercito.

May 347 indibidwal na lumagda bilang co-signatories, kabilang sina Constitutional Commissioner Ed Garcia at National Artist Virgilio S. Almario. Ayon sa ulat, ang unang beripikadong ethics complaint ni Aceron laban kay Escudero ay isinampa noong Oktubre 2, 2025, kaugnay sa campaign donation at kontrata ng gobyerno, at sumunod ang ikalawang reklamo laban kay Ejercito noong Enero 22, 2026 dahil sa kabiguang iproseso ang unang reklamo.

The post Full disclosure sa nag-leak na Blue Ribbon report, hinirit first appeared on Tonite - Abante.