DOJ ikakasa plunder case kahit wala si Zaldy Co

Itutuloy pa rin ng mga prosecutor ng Department of Justice (DOJ) ang plunder case laban kay dating Ako Bicol Party-list Rep. Zaldy Co kahit hindi ito bumalik sa bansa o magsumite ng counter-affidavit kaugnay ng flood control scam.

Ayon kay DOJ Spokesperson Atty. Polo Martinez nitong Lunes, Enero 2, hindi nakadepende ang panel ng prosekusyon sa magiging desisyon ni Co kaugnay ng kinakaharap nitong kaso ng pandarambong.

Nilinaw naman niya na nasa preliminary investigation pa ang plunder case dahil pinaplantsa pa ito ng mga prosecutor.

“As to when masu-submit, mare-release `yung resolution, let’s remember na may 60 days from the time the case was filed for the prosecutors to resolve the matter,” paliwanag niya.

Binibilang umano ang 60-day period mula sa petsa kung kailan isinampa ang reklamo.

“If the case is filed January 5, then 60 days after `yung deadline,” sabi ni Martinez.

Hindi aniya mapipigilan ang prosekusyon na resolbahin ang plunder case laban kay Co kapag nabigo ang kampo nito na maghain ng counter-affidavit.

“Kung hindi siya nag-submit, then the panel will resolve based on whatever evidence he submitted or lack thereof,” ayon kay Martinez.

The post DOJ ikakasa plunder case kahit wala si Zaldy Co first appeared on Tonite - Abante.