Kalahok sa BOSS Ironman Challenge pinalulutang ng LTO

Naglabas ang Land Transportation Office (LTO) ng dalawang hiwalay na show cause order laban sa mga natukoy na rider na lumahok sa BOSS Ironman Challenge sa Mindanao noong Enero 31 at Pebrero 1.

Ayon sa LTO, sa ilalim ng unang order, napag-alaman na may ilang kalahok na nag-over speed ng higit sa 80 kilometro kada oras sa national roads, na labag sa Land Transportation and Traffic Code. Nakumpirma rin sa mga video footage ang hindi awtorisadong paggamit ng blinkers, sirena at auxi­liary lights, na nagdulot ng sagabal sa daloy ng trapiko sa intersections at naglagay sa panganib ng mga pedestrian at ibang motorista.

Sa ikalawang order naman, tinukoy ng ahensiya ang ebidensya ng reckless driving, obstruction of traffic, improper person to operate a motor vehicle, disregard for mandated vehicle handling protocols, property damage at injuries sa pedestrians at bystanders.

Pinahaharap ng LTO ang mga rider sa kanilang tanggapan at hinihikayat silang magsumite ng paliwanag kasama ang mga dokumentong susuporta sa kanilang depensa kaugnay ng mga naturang pag­labag.

Hinimok naman ni LTO Chief Markus Lacanilao ang mga organizer at kalahok na makiisa sa imbestigasyon ng ahensiya upang masiguro ang kaligtasan sa kalsada.

The post Kalahok sa BOSS Ironman Challenge pinalulutang ng LTO first appeared on Tonite - Abante.