Terry Ridon niresbakan ang Supreme Court sa pagdispatsa ng mga kaso

Hinimok ng isang mambabatas ang Supreme Court (SC) na tingnan din umano ang sarili nitong rekord kung kanilang nareresolba sa loob ng 24 na buwan ang mga inihahaing kaso sa kanila.

Ginawa ni Bicol Saro Party-list Rep. Terry Ridon ang pahayag matapos ilabas ng SC ang desisyon nito sa motion for reconsideration ng Kamara de Representantes kaugnay ng impeachment case laban kay Vice President Sara Duterte.

Sa desisyon ng SC, pinagtibay nito ang unang hatol na unconstitutional ang isinampang impeachment case dahil sa paglabag sa one-year bar rule.

“Very important din po siguro tutal parang very concerned ang Korte Suprema sa usapin ng timelines, sinasabi po nila dahil impeachment should be an expeditious process,” sabi ni Ridon sa isang media forum sa Quezon City noong Sabado, Enero 31.

“But we’d also like to bring the question back to the Supreme Court today,” dagdag pa nito.

Ayon kay Ridon, nakasaad sa 1987 Constitution na ang SC ay mayroong 24 na buwan para resolbahin ang isang kaso mula sa paghahain ng briefs o memoranda.

“So ibig sabihin to speak to Congress that impeachment is an expeditious matter, I think they should look at themselves as well on whether or not they are able to comply with this particular 24-month period to resolve cases within their court,” sabi ni Ridon.

Giit ni Ridon na mahalagang malaman kung nakakasunod din ang SC sa mandato nito.

Nilinaw naman ni Ridon na susunod ang Kongreso sa requirement na itinakda ng SC sa naging desisyon nito sa impeachment case laban kay Duterte. (Billy Begas)

The post Terry Ridon niresbakan ang Supreme Court sa pagdispatsa ng mga kaso first appeared on Tonite - Abante.